A conselleira de Política Territorial, Obras Públicas e Transportes, María José Caride, presentou hoxe un avance da Lei de Medidas Urxentes de Ordenación do Territorio e do Litoral de Galicia, que entrará proximamente no Parlamento.
As propostas avanzadas hoxe artéllanse en catro grandes áreas para implantar medidas cautelares en materia de ordenación do litoral, crear o Instituto de Estudos do Territorio, previr os incendios forestais nas proximidades das urbanizacións e integrar os procedementos ambientais e urbanísticos.
As medidas cautelares en materia de ordenación do litoral incluídas no avance da lei supoñen a suspensión do desenvolvemento urbanístico de terreos situados a menos de 500 metros do mar naqueles concellos que aínda non adaptaron o seu planeamento á lexislación vixente. O fin desta medida é o de preservar os valores paisaxísticos e a riqueza natural da costa galega mentres non se completa a adaptación do planeamento ás novas leis. Polo tanto, suspenderanse todas as novas actuacións urbanísticas sobre o litoral galego que se pretendan desenvolver ao abeiro de planeamentos obsoletos.
Esta suspensión poderá aplicarse en todos os municipios costeiros que no seu planeamento teñan clasificados, dentro desa franxa, terreos de solo urbanizable, apto para urbanizar ou rústico apto para o desenvolvemento urbanístico. Ademais, no caso dos municipios costeiros con poboación inferior a 50.000 habitantes, estas limitacións estenderanse aos terreos que, malia estar clasificados como solo urbano, non reúnan os requisitos de solo urbano consolidado e, en todo caso, aos terreos incluídos en polígonos, unidades de actuación ou de execución.
Esta suspensión será de aplicación nos concellos que non teñan adaptado o seu planeamento á lexislación vixente, nomeadamente á Lei 9/2002, coñecida como Lei do Solo, e abrangue aos instrumentos de xestión ou execución do planeamento que, no momento da entrada en vigor desta Lei de medidas urxentes, non estean aprobados definitivamente.
Segundo argumentou a conselleira María José Caride, “a pesares de ter finalizado o prazo para adaptar o planeamento urbanístico ao disposto na dita Lei 9/2002, a grande maioría dos plans de ordenación actualmente en vigor quedaron obsoletos porque nin se acomodaron á normativa urbanística e ambiental actualmente vixente nin son compatibles coas esixencias de sustentablilidade económica, social e ambiental”. Caride engadiu que na maioría dos planeamentos vixentes “poden observarse áreas completamente desligadas da malla urbana que se clasificaron como solo urbano sen cumprir os requisitos legalmente establecidos, ou terreos rústicos nos que concorren valores merecedores de especial protección, segundo o disposto nos artigos 15 e 32 da Lei 9/2002, pero que no planeamento clasificáronse para servir de soporto a novos desenvolvementos urbanos”.
A conselleira tamén enumerou, entre outras eivas destes planeamentos non adaptados “a cualificación de solo para implantar novas zonas verdes, espazos libres e equipamentos públicos que resultan notoriamente insuficientes para atender as demandas xeradas polo crecemento urbano ou que son inferiores aos estándares mínimos de calidade de vida establecidos no artigo 47 da Lei; ou a carencia absoluta de reservas de solo necesarias para atender as demandas de vivenda suxeita a algún réxime de protección pública, incompatible co mandato constitucional de garantir o acceso dos máis desfavorecidos a unha vivenda digna”. María José Caride citou tamén que hai plans non adaptados á Lei que “propician a proliferación de edificacións sen a previa urbanización dos terreos e privando á comunidade de participar nas plusvalías xeradas polo planeamento urbanístico”.
A Lei de Medidas Urxentes de Ordenación do Territorio e do Litoral de Galicia contempla tamén a creación do Instituto de Estudos do Territorio. Entre as súas funcións atópase principalmente prestar asistencia e asesoramento aos concellos para a elaboración, xestión, adecuación e execución do seu planeamento, así como realizar traballos de investigación e difusión e prestar apoio á consellería. Este Instituto tamén se encargará da análise, o estudo e o asesoramento en materia de urbanismo e ordenación do territorio. Será un organismo autónomo de carácter administrativo e estará adscrito organicamente á consellería competente en materia de urbanismo e ordenación do territorio, actualmente a CPTOPT.
Outras medidas
En canto ás actuacións de prevención de incendios forestais nas urbanizacións recollidas entre as medidas urxentes presentadas hoxe, estas van destinadas ás edificacións situadas a menos de 400 metros de terreos forestais ou no seu interior, quedando excluídas as explotacións agrícolas e gandeiras. Nesas urbanizacións establecerase una servidume de protección nunha franxa de 25 metros arredor do perímetro, sendo unha obriga dos propietarios o seu mantemento libre de vexetación seca e coa masa arbórea clarexada. Nos casos en que a franxa de protección non pertenza aos propietarios das urbanizacións, establécese unha servidume forzosa para acceder á mesma durante o tempo mínimo necesario para realizar os traballos de limpeza.
Ademais, os propietarios ou comunidades de propietarios deberán manter igualmente limpas as parcelas non edificadas e as vías privadas tanto internas como de acceso, presentar ante o concello correspondente un plan de prevención e defensa contra incendios forestais e dispor dunha rede de hidrantes homologados para a extinción de lumes. Pola súa banda, os concellos deberán limpar os viarios e camiños de titularidade municipal.
A futura Lei tamén regulará a integración dos procedementos ambientais e urbanísticos en relación coa avaliación ambiental estratéxica dos plans de ordenación.
María José Caride espera que a lei sexa tramitada o antes posible e que a CPTOPT estea en condicións de poder aplicala no segundo trimestre do ano 2007. Na explicación dos contidos desta nova norma a conselleira estivo acompañada polo director xeral de Urbanismo, Ramón Lueje.
Fonte: Xunta de Galicia
Noticias relacionadas:
none
