A conselleira de Política Territorial, Obras Públicas e Transportes, María José Caride Estévez, reuniuse esta mañá coa directiva da Federación Galega de Municipios e Provincias (FEGAMP), encabezada polo seu presidente, Xosé Crepo, para analizar o desenvolvemento do Pacto Local nas materias que afectan ao seu departamento. Como punto principal falouse da posta en marcha da Axencia de Protección da Legalidade Urbanística, creada pola CPTOPT e que contará coa colaboración dos concellos. A FEGAMP quere ratificar a súa participación no novo organismo nunha reunión da súa comisión executiva que celebrará esta semana. Tras ese referendo, segundo indicou a conselleira, “esperamos que a próxima semana poidamos firmar o decreto de constitución da axencia, un órgano consorciado entre os concellos e a Consellería de Política Territorial que se encargará fundamentalmente das labores de inspección, reposición da legalidade urbanística e mecanismos de sanción”.

Ademais da axencia, dentro do Pacto Local trabállase tamén, a petición dos concellos, en modificacións da Lei 9/2002, coñecida como Lei do Solo, en aspectos que afectan aos núcleos rurais. María José Caride salientou “a colaboración que se está a producir para que entre todos poidamos acadar un territorio mellor ordenado e con mecanismos que permitan aos concellos desenvolver de forma ordenada o seu planeamento, que faciliten aos concellos adaptar o seu planeamento á lexislación vixente”.

Pola súa banda, Xosé Crespo cualificou a Axencia de Protección da Legalidade Urbanística como “unha ferramenta moi válida para poder traballar” conxuntamente entre os concellos e a Consellería de Política Territorial. Por iso, insistiu na necesidade de que o organismo “teña os maiores recursos posibles dentro dos orzamentos, dada a actual preocupación polos asuntos urbanísticos, para que vaia polos mellores derroteiros posibles”.

Para o vindeiro ano, os orzamentos da CPTOPT prevén un investimento de 408.000 euros para a posta en marcha da axencia.

Fonte: Xunta de Galicia

Quizás también te interese:

• A CPTOPT e a FEGAMP acadan un acordo unánime sobre os estatutos que rexerán a axencia de protección da legalidade urbanística
• O director xeral de Urbanismo anuncia a inmediata posta en marcha da axencia de protección da legalidade urbanística
• Caride reitera a súa disposición a reunirse nos vindeiros días coa Fegamp
• Constituída a Axencia de Protección da Legalidade Urbanística coa publicación dos seus estatutos no DOG
• A Policía Autonómica intervirá no control da legalidade urbanística